This Month We Celebrate

Nyirabagwiza Magnifique: “Chicken farming: Quick money, short period with a small house”

Our Newsletter

Subscribe our Newsletter and receive notifications of new posts by email.

 

2016-11-29 20:02:45

Ubuhinzi Bwacu: Ibitekerezo ku ngingo igira iti:IBYONNYI N'INDWARA M'UBUHINZI

Bimaze kumenyerwa ko  kucyumweru ku mbuga nkoranyambaga zitandukanye za YEAN tuba turi mu kiganiro UBUHINZI BWACU. Ku cyumweru tariki 6 Ugushyingo 2016 twaganiriye  ku nsanganyamatsiko igira iti  ” IBYONNYI N’INDWARA M’UBUHINZI “.

Iki kiganiro abahinzi bagaragaje ingaruka nyinshi bahura nazo kubera ibyonnyi ndetse n’indwara zitandukanye maze bigatera kutagera ku musaruro wari witezwe ndetse  n’igishoro cyakoreshejwe ntikibashe kugaruka hamwe  maze umuhinzi bikarushaho kumuca intege mu buhinzi bwe. Izi ndwara ndetse n’ibyonnyi ukwiyongera kwabyo kandi nabyo biri muri zimwe mu ingaruka z’imihindagurikire y’ikirerere. Umuhinzi ati “Benshi mu bahinzi bahura n’ibyonnyi rimwe na rimwe ibihingwa byabo bigashira kubera kutamenya kubirwanya bakagwa mu gihombo. Undi  ati” Uko bigaragara umuhinzi aracyacyeneye ubufasha mu guhangana n’izi mbogamizi ahura nazo mu buhinzi”. Muri iki kiganiro havuzwe byinshi bitandukanye ariko byose bigendeye  kuri iyi mirongo nyamukuru:

Uko umuhinzi azi igitera ibyonnyi n’indwara n’uko yabyirinda.

Abahinzi bamwe na bamwe bagiye bazi bimwe mu bimenyetso bigaragaza uburwayi ndetse n’ibyonnyi bimwe na bimwe bitewe n’ uko hari amwe mu mahugurwa bakorewe ndetse n’uburambe umuhinzi aba afite mu mwuga w’ubuhinzi. Uyu muhinzi ati ” Abahinzi baba abato n’abanini, abakora kinyamwuga n’ abandi, ibitera indwara mu murima n’imyaka barakizi cyangwa bagifiteho Ubumenyi. Hari n’abazi uburyo bwo kuzimenya ibimenyetso no kuzirinda.Imfashanyigisho zirahari ubukangurambaga nibwo bukenewe”. Undi muhinzi ati” Iyo nitegereje nsanga abahinzi benshi baba bazi ibyonnyi ahubwo haba ikibazo cyo kwegera aba agronomes(aguronome) ngo babafashe”.

N’ubwo umuhinzi yaba asobanukiwe ubuhinzi ariko abahinzi bavugaga ko akeneye ubufasha bw’umutu wabyigiye ubisobanukiwe maze akamufasha guhangana n’izo ndwara ndetse n’ibyoryi. Aha ubukangurambaga burakenewe ku bahizi ikindi abafite ubuhinzi mu inshingano bakegera abahinzi bakabafasha. Gusa ariko abahinzi bagarutse no kuburyo bwo kumenya indwara ku buryo bwa gakondo abahinzi bakoresha bitewe no kumenyera ibiba mu murima ndetse no kuzirwanya nabyo bigakorwa gakondo ariko ugasanga nta kintu kinini bifasha umuhinzi nko gukoresha uburyo bwa gihanga bugezweho.

2) Imbogamizi zihari mu kurwanya ibyonnyi n’ indwara m’ubuhinzi

Ibyonnyi bigaragara muri season A2017

  • Nkongwa y’ibigori;
  • Agasurira karya kawa;
  • Umugese mu muceri;
  • Kabore mu myumbati;
  • Inda mu nturusu;
  • Igifuruto (lamp skin) ku nka;

Izi ndwara zose rero siko abahinzi bazisobanukiwe  ndetse n’abacuruza imiti nabo ntago ari bose bazisobanukiwe . Uyu yagize ati “Akenshi usanga bihutira mu ma pharmacie agro-vet kugura imiti kandi abakora muri izo pharmacie  ntibaba babisobanukiwe akamuha umuti ubonetse wose bigatuma n’icyo yarengeraga cyangirika umusaruro ukabura”. Uyu nawe yunga murye ati “ndemeranya nawe,aho agrovet zibereye nyinshi abahinzi ntibakita kukwegera agronome cyangwa veterinaire. Bahita bajya kugura imiti ,Bivuze  ko umuhinzi ariwe wikoreye Isuzuma ry’ibihingwa bye,yiyandikira umuti akaza no kuwiterera!”.

Mu by’ukuri abahinzi benshi bakunda kugwa murujijo bigatuma bakoresha imiti nabi nabyo bikabyara izindi ngaruka . Uyu yagize ati “Niko bimeze aho ntuye ndabibona cyane umuhinzi aza abaza umuti ntaza avuga ibyonnyi byafashe ibihingwa bye cg yanabivuga ukumva umucuruzi ngo uwaguha uyu muti nabonye benshi ariwo basigaye bagura. Ubu buhinzi bwacu ni gati ki koko?“

3) Ingaruka ziva kuri izi ndwara n’ ibyonnyi k’ubuhinzi ndetse no k’umusaruro

Izi ndwara tuvuga aha zigira ingaruka nyinshi ku buhinzi ndetse n’umusaruro , uretse ibyo twagarutseho haruguru byo kugabanya umusaruro ndetse bikanatera igihombo , bishobora no kugira ingaruka ku bidukikije ndetse n’ubuzima bw’umuntu . Uyu ati “Mubyukuri ibyo muvuze ndemezanya nawe, maze iminsi mbona abantu bahinga inyanya hafi yaho nkorera   batera dethane nyinshi cyane barangiza bakazironga bagahekenya namubaza nti kuki utera umuti mwinshi kugera naho na photosynthesis ushobora kuyihagarika akambwira Ngo bibafasha gutuma zihisha vuba…. Urumva rero abahinzi bakeneye amahugurwa ku ndwara ndetse n’imiti” Mu bihugu byateye imbere mu buhinzi bimaze kumenyerwako gukoresha cyane imiti yica udukoko mu mirima bigira ingaruka ku buzima bw’ibidukikije , hakaba hagenda hashakishwa uburyo bwo kugabanya iyo miti ndetse n’imwe n’imwe itera ingaruka zihambaye ikagenda isimbuzwa ibasha gukora neza nta ngaruka . Imiti nubwo igabanya ibyonnyi ariko hari n’ibyo ibangamira mu bidukikikije . Ubushakashatsi bukwiye kugenda bugaragaza ibyo abahinzi bagakwiye kugenderaho kandi abahinzi nabo bakihutira kubaza agoronome mu gihe bahuye n’indwara batazi mu murima wabo.

4) Ibisubizo birambye bihari kugira hazaboneke umusaruro mwiza.

Muri iki kiganiro abahinzi bunguranye  banagaragaza icyakorwa ngo imbogamizi zikigaragara zigende zikemuka. Uyu yagize ati “

Muri rusange usanga abahinzi batazi igitera ibyonnyi cyangwa indwara, kuko usanga nta n’uburyo bwihariye bateganya igihe cy’ihinga, gusa ubu usanga bitewe nigihingwa runaka basigaye bitabira kugura insecticide cyangwa indi miti runaka igakoreshwa nubwo ikoreshwa nabi nko ku bipimo birenze  , kubisubizo birambye mbona leta ifite project yitwa plant wise, banahugura aba agronome b’imirenge bakaba abavuzi b’ibihingwa, usanga bishimishije iyo umuhinzi afite urugero rw’igihingwa kirwaye akazana kuvuza’’

“Abahinzi aha bashishikarizwa kwihutira kugisha aba agronomes mu mirenge yose barahari cyangwa amaduka acuruza imiti ndetse n’ibindi bigo bizobereye mu buhinzi bakabagira inama y’ama pesticides(imiti irwanya udukoko)bakoresha cyangwa  se izindi ngamba za ngombwa kugirango bace ibyonnyi kandi umusaruro wiyongere”.

“Nakwisabira inzego zishinzwe ubuhinzi gushaka ukuntu hajya hapimwa ubushobozi bw’ubutaka mu kwirinda indwara, tugakumira kuko kwirinda biruta kwivuza, Urugero: Mu gihugu cya Kenya inzego z’ubuhinzi zikoresha utwuma twitwa “soil care” kagapima ikigero cy’uburumbuke bw’ubutaka ndetse n’ubushobozi bwifitemo mu kurwanya indwara (Soil Resistance to Diseases). Naho mu Rwanda dupfa kurunda ifumbire mu butaka nta makuru ufite kuri ubwo butaka.”

“Kongerera ubumenyi buhagije mubashinzwe ubuhinzi (Agronome) kuko kenshi usanga baraguza umutwe cyangwa bakajya mubitabo/internet

“Guhugura abakangurambaga b’ubuhinzi mu midugudu nabo bagahugura abahinzi bagenzi babo”

“Gukangurira abahinzi uburyo bwa kamere cyangwa kurinda ibihingwa dukoresheje ibinyabuzima: lutte bioligique”

“Kwikorera mu Rwanda imiti ishingiye kubimera byacu ikajya yifashishwa mugihe umuhinzi adafite ubushobozi.”

“Narimo nganira n’abahinzi bambwirako  imbaraga zikoreshwa mu gushakira umuhinzi amafumbire ndeste n’imbuto zagakwiye gukomeza, kugira habeho kubungabunga zambaraga zakoreshejwe zikabyara umusaruro. Abahinzi bagira bati. Ducyeneye ubufasha ngiro buhoraho mu kubungabunga ubuhinzi tuba turi gukora bwa buri munsi ntibirangirire mu kutuzanira ifumbire n’imbuto.”

Icyitonderwa:

Ibitekerezo byatanzwe byose ntago byagarajwe hano bitewe n’uko ari ikiganiro kirekire cyane hagiye hatoranywamo imirongo migari ikavugwa muri make. Amazina yabatanze ibitekerezo ntago yagaragajwe muri iyi nkuru gusa amagambo yose ari mu utwuguruzo n’utwugarizo (“…”) yose yandikuwe uko yanditse mu kiganiro.

Ikiganiro nk’iki kiba buri ku Cyumweru.

Ushaka gukurikira ibi biganiro ukaba uri umuhinzi/umworozi cyangwa umugoronome/veterineri ku rwego urwo arirwo rwose nawe wasaba kujya k’urubuga rwa YEAN Whatsapp unyuze kuri nimero ikurikira: +250 788 845 727 ,wakurikira YEAN kuri facebook cyangwa kuri twitter #UbuhinziBwacu @YEAN_Rwanda

Related Articles | Izindi nkuru

Be the first to comment!