This Month We Celebrate

We want to change the image of sweet potatoes said Regis Umugiraneza

Our Newsletter

Subscribe our Newsletter and receive notifications of new posts by email.

NIYIGABA  Etienne

2018-05-02 16:00:00

Inama zigirwa umuhinzi wifuza guhinga Inyanya

Inama zigirwa umuhinzi wifuza guhinga Inyanya

Hitamo ubwoko bujyanye n’aho ushaka kuzihinga n’iyo uzihingiye

Bitewe n’umurima wawe uko ungana ushobora guhitamo imbuto zijyanye n’uburyo wowe ubyifuza. Niba wifuza inyanya zikura cyane zigasagamba cyangwa se wifuza izidakura ngo zisangambe, niba se wifuza izigira uruti rukomeye zidakenera umuhembezo, ibi byose bizajyana n’uburyo uzabasha kwita kuri ubwo bwoko bitewe n’ibyo bukenera . Menya neza uburyo imbuto uhinze yitabwaho by’umwihariko kugirango iguhe umusaruro nyawo.

Menyereza ingemwe mbere yo kuzitera mu murima.

Aha turavuga umuhinzi ukoresha uburyo bwo kwinaza cyangwa guhumbika ingemwe  bidakorewe mu murima azahingamo. Ntago wahita ujyana ingemwe mu murima ako kanya utarazimenyereje hanze ngo wizereko zizitwara neza. Fata umwanya nk’isaha imwe cyangwa ebyiri buri munsi uzijyane hanze ku buryo zitangira kumenyera uko mu murima haba hameze hanyuma uzisubize mu nzu wazihumbikiyemo (green house). Nka nyuma y’iminsi icumi ukora ibi ziba zaramenyereye . Ubone kuzigemura uzitera mu murima.

Shyira umwanya uhagije hagati y’ingemwe

Iyo umaze gutera ingemwe mu murima zitangira gukura , kuva igihe uzitereye kugeza igihe zizerera ziba zarakuze cyane , zikenera rero kuba zifite umwanya uhagije zizakuriramo mu mpande zose. Nuzegeranya cyane ntago zizabasha kwera neza uko zigomba . Buri rugemwe ugomba kurugenera icyo rwuririraho rukura gishobora kuba igiti cyangwa umugozi bitewe n’uko wabigennye, ibi bituma ibibabi n’imbuto bidakora ku butaka , iyo bikoze ku butaka bishobora kubora bikangiza igihingwa cyose kigapfa.

Zitere ahantu hari izuba rihagije

Igihingwa kibyara imbuto (fruit) gikenera nibura amasaha arindwi y’izuba ku munsi. Ibihingwa kandi bibeshwaho no guhumeka kabyo kwitwa Fotosentezi (Photosynthesis) gufasha igihingwa  mu gukora ibigitunga kandi kikanabyara imbuto nyinshi. Inyanya zawe nizitabona izuba rihagije zishobora gusa neza ku mababi ariko ntago zizatanga inyanya nziza.

Kuba umurima wawe utarekamo amazi

Kuko inyanya zigira indwara nyinshi zituruka ku duhumyo duto, ni ngombwa ko umurima wawe uba uhitisha amazi. Ugomba kuba ufite ubutaka butari inombe cyane kandi buhitisha umwuka n’amazi, budasharira cyane kandi bufite ifumbire mborera nyinshi. Kuhira inyanya byongera umusaruro , nikorwa ku mugoroba  izuba rirenze, kandi bigakorwa ku gihe. Irinde kunyanyagiza amazi ku mababi no ku mbuto , ugomba gukora kuburyo ubutaka bukomeza butohereye ariko amababi agahora yumutse.

Gufumbira bikwiye

Ifumbire ni ngombwa mu nyanya ariko gufumbira birenze urugero nabyo bituma inyanya zigira ibibabi byiza bishishe ariko ntizizane imbuto nyinshi. Niba ugiye kugura ifumbire gura ifumbire yagenewe inyanya. Iraboneka mu maduka y’inyongeramusaruro yose.

Kugabanya no gukuraho amababi adakenewe

Inyanya zikenera kugabanyirizwa amababai kugirango hirindwe indwara mu gihe zifite amababi menshi cyane. Ikibitera n’uko iyo amababi ari menshi hashobora kugira amazi abyibikamo bigatera za ndwara zituruka ku duhumyo. Kuyagabanya rero bituma inyanya zihumeka neza. Ikindi ni uko iyo zifite amababi menshi zihutira gukoresha intungagihingwa zifite mu gukuza amababi aho gukuza imbuto kandi wowe icyo ushaka ni imbuto si ibibabi. Ushobora kandi gukuraho amashami mato kugirango amanini abyibuke kandi azane imbuto nyinshi.

Gusasira inyanya

Gusasira inyanya bituma ubutaka bugumana ubuhehere maze bugatuma imizi ihora ifite amafu kandi ifata intungagihingwa neza , bigabanya isuri mu murima wawe kandi bigabanya n’indwara zituruka mu butaka zangiza ibihingwa.

Byateguwe na NIYIGABA Etienne (eniyigaba@yeanrwanda.org)

Related Articles | Izindi nkuru

Be the first to comment!